Bayronun dünyagörüşündəki ziddiyyətlər- fərdiyyətçilik, ümidsizlik, ekzotikaya aludəçiliklə yanaşı, üsyankar ruh, azadpərvərlik, məzlum xalqlara rəğbət hissi yaradıcılığının əsas xüsusiyyətləri olmuş, yaratdığı obrazlarda da öz əksini tapmışdır. Bayron şəxsiyyətə çox önəm vermiş, buna əsasəndə az sayda obrazlar yaradaraq əsərin bütün anlamını həmin şəxsiyyətlər vasitəsilə ifadə etmişdir. Bayronun yaratdığı əsas qəhrəmanlar tək mübarizə aparır, sonda elə  bu mübarizədə öldürülürdülər. Buna görə də, bu qəhrəmanlar ədəbiyyatda «Bayronik qəhrəman» adlandırılırdı. «Abidos gəlini» əsərinin «Bayronik qəhrəman"ı Səlim idi. Şair bu poemasında Səlimin nitqinə daha çox yer vermişdir. Əsərdəki əsas hadisələr- azadlıq mübarizəsi, intiqamın alınması, sevgiliyə qovuşmaq istəyi bütün bunlar hamısı Səlimin ətrafında cərayan edirdi. İngilis, bir xristian olmasına baxmayaraq, Bayronun yaratdığı bu qəhrəman əsl müsəlman, bir türk idi.