Ş.Ağakişiyeva
Bakı Slavyan Universiteti

Azərbaycan dili təlimində dərsə verilən müasir tələblərlə bağlı müəllimlərin qarşısında bir sıra mühüm vəzifələr durur. Onlar Azərbaycan dili təlimində istifadə olunan metodların təkmilləşdirilməsi və müasir dərsə verilən tələblərin həyata keçirilməsi üçün bütün imkanlardan istifadə etməlidirlər. Azərbaycan dilinin daha dərindən, hərtərəfli mənimsənilməsinə xüsusi diqqət yetirməli, təlimin ən mütərəqqi metod və priyomlarından yaradıcı şəkildə istifadə etməklə qarşıya qoyulan məqsədə nail olmağa çalışmalıdırlar. Həmin məqsədlərə nail olmaq, şagirdlərin fəallığını qorumaq üçün müxtəlif metodlardan istifadə edilir. Azərbaycan dili dərslərində fəndaxili əlaqə qeyd olunan imkanlar baxımından da diqqəti cəlb edir.
Dərsin uğurlu alınması üçün də fəndaxili əlaqədən istifadə vacib amillərdəndir. Belə ki, müasir dərsə verilən tələblərdən biri də elmilik prinsipinin gözlənilməsidir. Elmilik prinsipinin gözlənilməsinə kömək edən tədbirlərdən biri də fəndaxili əlaqənin bütün imkanlarından dərs zamanı məharətlə istifadə etməkdir. Fəndaxili əlaqənin təmin edilməsi, bir tərəfdən elmilik prinsipini tamamlayır, digər tərəfdən, şagirdin biliyini sistemləşdirir, bütövləşdirir.